神沙都換得！找換店老闆：「我太有良心...」
文: M!C
每次去完旅行，總會用剩啲碎銀 (又名神沙)，如果你好鍾意個地方，當然可以儲起做紀念，又或者留番下次用；但去完「一次就夠」嘅地方，大多數人都唔知點處理。深水埗近排開咗間找換店，話神沙外幣都換得，係咪咁堅先？一於去現場望望。
深水埗深之都商場嘅「發達鳥」找換店，2015年1月開業，店內由人民幣、台幣、日元、韓圜到紐西蘭元都有得換，主打去短線旅遊熱點嘅港人。
廢話少講，個價靚唔靚？就用佢同中環「百年」一較高下。以3月3日為例，「發達鳥」港元兌日元係0.6495，同百年一樣；兌人民幣嘅話「百年」就會再抵少少（「發達鳥」：80.9/「百年」：81.0），但兌韓圜或台幣「發達鳥」都靚價過「百年」，看來甚具競爭力，「發達鳥」老闆Eric亦言日元同人民幣最多人兌換。
不過，我們已經有「百年」，你還有什麼賣點？「有！百年或銀行全部五、六點就收工，但我呢間開到夜晚八點。如果有預約交易，等到你九點都得！」
不過，神沙個Rate特別貴...
既然「發達鳥」以「全港第一/唯一銀仔都收嘅找換店」自居，一於就試下去兌啲神沙。咦，原來換神沙個rate會特別貴。舉例說，221台幣神沙，只兌到$43.2港幣（匯率5.11！），「發達鳥」老闆Eric也直認不諱:「個兌率的確唔高，不過有啲銀仔你放屋企始終無用，不如同我兌番港紙好過。而且我獨市嘛，總有人需要換嘅。」
當日兌換了台幣跟坡紙，以下為兌換前後圖。( 221台幣>>43.2港紙 // 4.2坡紙>>17.7港紙)
計番出嚟...唔，個價唔算吸引，但學老闆話齋，如果個旅遊點真係無下次，近排又無friend去嗰頭，咪變返佢做港幣篤串魚旦囉。
仲有特價Coupon賣
袋穩啲散紙後，見到呢間店原來有各大超市、商店同現金劵賣，當中以聖安娜最抵，有78折（有效日期仲去到2024年添）。「唔少人專程嚟掃麥記COUPON，佢地無兌錢架，不過都無所謂，買一張都歡迎！」這位老闆自得其樂，仲話嚟緊會繼續推出不同的現金劵，大家都可以留意下（之前有starbucks，不過已賣哂）。
見Eric咁健談，不禁同佢傾多兩句。一傾之下，先知佢係旅行發燒友，仲去過5年Working Holiday咁多（兩年英國、一年加拿大、兩年澳洲），聽到小記都好羨慕。Eric咁鐘意去旅行，皆因佢酷愛自由，對未知的新事物充滿好奇心，好想去挑戰。「我真係停唔落黎架。」
然而，到處遊歷過後，Eric決定將所賺返來的錢在香港開設找換店，希望以曾經是背包客的身份，跟不同的旅客分享旅行二三事。「每次聽佢地分享，自己都好似活在旅程當中，最重要嘅係，交流過後，大家嘅生活都多姿多彩起來。」
店舖內的小趣事...
開業大約一個月多，有無特別難忘的趣事？「我記得最莫名其妙嘅，係五分鐘內有三個互不相識嘅人喺我店外排隊，但佢地都唔係嚟兌換外幣嘅...」又買現金劵嗎?「唔係！佢地都係過嚟同我傾偈，哈哈！」
原來Eric自己本身十分熱愛日本，加上媽媽是台灣人，所以他對這些地方都很熟悉。每次有朋友去台灣、日本等旅行，都會搵呢位「專業導遊」取經，聊一、兩小時是常識吧。
而我亦慢慢發現，在這個只有幾十平方米的小店子，之所以讓人感覺到那麼愜意，除了因為老闆友善的關係，更大程度是因為店內播放著像去了cafe般輕鬆的背景音樂，教人悠然自得。
「咦，你連魔術用品都賣？」其中一頁介紹魔術道具的投影片突然引起了我注意。「喔唔係，呢個係樓下嘅店舖，因為我同佢熟，所以幫佢宣傳一下咋，哈哈！」在自己商店宣傳別人的東西，還津津樂道地介紹他賣的魔術產品，Eric確是神奇。
搵得唔多 收入弱水三千
健談開朗的老闆，加上殷勤好客的服務，你的生意如何？「不妨同你講實話，呢個月我只賺咗$3000！」這位老闆確實坦白得可愛，害我不知道接著該問什麼好。是人流問題？是成本問題？還是...？「係我太有良心...你可以四處格價，格價後你就會知道我真係賺唔多。」
咁...你覺得間舖做唔做得住？「得嘅，不過係時間問題。」嗯...然後Eric突然來個反高潮：「如果真係要執笠嘅，咁我就去環遊世界啦！」
跟這位神奇找換店的老闆談了一回後，感覺自己也像去了趟旅行似的，真的好神奇呀～！
港生活人氣本地熱話
↓【限時搶⚡】原箱高鈣梳打餅↓
↓黑芝麻 / 芥末味｜口感香脆、高鈣健康↓
【請您去】iSQUARE國際廣場「爆」趣童玩之旅💥
↓ Striking爆炸糖Strikids(爆炸仔)小隊✨ + 本地懷舊玩意元素🙌 ↓
