愛回家丨Fanny取代無知May成大小姐新秘書？ 張盈悅演技被抨擊：係對我嘅鞭策
處境劇《愛回家之開心速遞》昨晚一集「蓮的騎呢秘書」中，講述大小姐（林淑敏 飾）因秘書無知May（趙希洛 飾）請假，要急聘臨時秘書，經篩選後找來王若詩（譚淑瑩 飾），沒想到她竟然是龍力士（鄭世豪 飾）二房的臥底，幾乎偷走她的計劃書。混亂之間，Fanny（張盈悅 飾）撞破王若詩偷USB一事，立下大功，大小姐讚她老實不貪心，決定請她做秘書頂替無知May。
該集播出之後，不少網友議論紛紛，事關無知May一向跟大小姐擦出不少火花，擔心趙希洛將會離開劇組。另外，張盈悅加入《愛回家》短短日子，竟然有機會演出主線情節，實在為觀眾帶來驚喜。張盈悅接受本網電話訪問，她表示：「我角色唔屬於主線，當然大小姐先係主線。今集多咗同場機會，向佢偷師，真係好開心。第一眼見到劇本標題『騎呢秘書』，我都好奇，睇到最尾先發現真係講緊Fanny。多謝監製、編劇冇嫌棄我係新手上路，仲容許我將『騎呢』進行到底！（同大小姐對手戲感壓力？）有啲緊張，佢同其他同事好肯畀我貼士，加上自己都做咗好多準備功夫，閉關喺屋企去搵一個『騎呢』嘅狀態，練習吓以前做過嘅獨白功課，希望發揮得最好盡力配合劇情。」
早前有報道指網友抨擊張盈悅的演技，斥《愛回家》劇組有靚女葉蒨文都唔捧反而捧佢，張盈悅坦言虛心接受，說：「我覺得觀眾嘅批評係對我嘅鞭策，會令到我反思。隨住演出經驗越來越多，更多觀眾可以從另一角度了解我。當然，我同Fanny一樣，都係初出茅廬嘅職場新鮮人，演繹過程中我都好有共鳴。當然，演技上我仲有好多好多進步空間，我會盡力把握好每個鏡頭，每次出鏡機會，盡量令Fanny更加有血有肉，引起大家共鳴。」問到是否取代無知May，她表示：「我目前嘅職位係臨時秘書，遲啲劇情會有交代。」
張盈悅是參選《2020年香港小姐競選》的海外佳麗，跟謝嘉怡一樣特別由外地返港比賽，可惜最終未能打入最後決賽十強。在美國修讀戲劇的她，抵港不久接受訪問時，又寒背兼擺甫士騎呢，問到為何山長水遠回港選美，到底是愛定責任？她以周星馳經典對白回答：「兩樣溝埋做瀨尿牛丸啦！」十分搞笑，當她與侯嘉欣被淘汰時，見對方爆喊，自認唔夠靚，沒想到張盈悅安慰她說：「你都靚過侯賽因嘅！」果然是無厘頭之選，相信張盈悅是周星馳的鐵粉。
隨後，張盈悅加入《愛回家》飾演MT Fanny，與子穎（李紹堅 飾）、Gigi（羅雪妍 飾）、阿壯（焦浩軒 飾）和Mike（曾展望 飾）組成「吉宜屋」努力搵外快，有不少發揮的機會。
港生活人氣娛樂新聞
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
