網民求救：公屋裝修遇無良師傅貨不對辦 係咪應該借錢再重新大執？！
裝修貨不對辦事件，經常發生！有網民就喺連登討論區求救，話朋友新公屋入伙，但遇上「無良裝修師傅」，間完嘅睡房放唔落三呎床，個電掣竟然無電到……大家認為樓主朋友，係咪應該借錢重新再裝修或補救返單位嘅間題，定還是忍耐吓，先住幾年再算呢？
樓主朋友嘅情況係咁樣：「朋友舊年收到公屋，請到無良師傅裝修，搞到貨不對版（辦），師傅又冇電牌，用磚間房又放吾（唔）落三尺（呎）床，電制（掣）又冇電到……儲錢已用哂……無奈之下，過年前搬入……但入住後目睹一切……朋友想年後借錢拆哂（晒）它重新大執……應支持他嗎？還是請他將就住落先！經濟好轉再搞呢？」
有網民支持要認真大裝修執漏：「睇下係咪好差，如果唔係三尺（呎）床唔夠瞓，全部電制（掣）無電到用唔到家電，而又長住，咁係應該整！尤其無電牌又整電，覺得有危險」、「有能力還咪借，住真係好緊要，清水裝其實已經好好住」。但亦有唔少網民覺得唔值得再花大錢裝修，小修小補就可以：「搵人駁返電就算啦……仲大修把鬼？！」、「油油佢咪算數！」、「公屋就算啦，反正都係交少少租」、「租者置其屋就話姐（啫），租嘅唔好搞咁多嘢，住住先囉！」、「無錢就淨係搵師傅做啲基本野（水電牆），其餘DIY算，Youtube好多外國人自己整」。
樓主朋友住公屋，裝修後收樓，發現房間連三呎床都放唔落！
而令網民都覺得「太離譜」嘅，係個師傅無電牌，電掣無電到！
大部分網民都認為唔值得借錢或再花大錢去大執單位，只需維修出錯部分。
你朋友求其搵人裝修，自己又求其睇，師父咪求其裝囉！
但有唔少網民都質疑：「點解公屋戶咁鍾意玩裝修？！」、「住公屋就咪X搞咁多野（嘢）啦！有瓦遮頭咪算X數囉！借錢重新大執不如借錢，下年搬私樓啦！」，了解嘅網民就話：「因為公屋上左（咗）樓就無敵，搵十幾萬都唔會被趕走，最多交市值租」、「咪係，攞間公屋綠表換居屋，居屋五年換手賺兩球，間爛公屋求其住住先」。
不過有唔少網民都覺得「師傅無電牌」呢件事太離譜，從而質疑樓主朋友，由當初搵裝修公司以至監察收樓，係咪太草率：「點會冇電牌？！」、「電唔到真係笑左（咗）」、「你朋友求其搵人裝修，自己又求其睇，師父咪求其裝，咁咪求其住囉！仲有冇問題？！」、「果然咩級數人就揾返D咩級數的裝修佬，住得公屋既（嘅）智商是否偏低？佢冇電牌，9做都肯找數？」。
網民質疑點解公屋戶會落重本大裝修單位。
網民認為樓主朋友當初「求其」搵裝修佬，監察收樓亦無認真睇清楚，其實亦應負上責任。
係咪喺公屋商場搵裝修佬？個啲，99%伏？！
網民跟住就熱烈討論，究竟位於屋邨商場、號稱專做公屋嘅裝修公司，係咪信得過：「佢係咪求其係（喺）公屋商場度搵裝修佬？個d，99%伏」，點知唔少網民都話呢類裝修公司，最多係收費貴少少，中伏機會反而唔大：「其實嗰啲先唔伏」、「做街坊獨巿生意，樣樣野（嘢）係貴少少，但應該唔會伏」、「做得耐果啲唔會伏，係收貴d」。咁網民認為邊類幫襯邊類裝修公司，中伏機會大？「嗰啲做落做熟街坊生意，熟晒架步間格先唔伏，最多係貴啲同要等，啲冇鋪頭嘅網店、19設計公司先最伏」、「依d先唔伏，你最多話佢收貴左（咗），但至少唔會爛尾；fb page放幾張3D相，跟住一個套餐價果d，就真係99%伏」，網民又偵探上身，推測樓主朋友點樣中伏：「商場個D 都肯定唔太差，佢呢D似樓下放個BANNER 個D」、 「我覺得佢似再伏啲，係（喺）啲we chat、小紅書搵」。
網民認為幫襯無鋪面嘅網上裝修公司，中伏機會好高。
至於喺公屋商場嘅裝修公司，網民反而覺得做開街坊生意，客人中伏機會低，缺點只係會價錢稍貴。
text/Joyce
photo/HKET圖片庫
========
同場加映：
【蝸居睇樓團】深井828呎變京都風和室 極chill山景咖啡吧 仿和紙屏風、嚴選木器傢俬
港生活人氣本地熱話
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
【社群送禮🌸】送您麒麟一番搾啤酒及「和風櫻花禮品套裝」！
↓簡單一步登記贏禮物！↓
